Marcelle se reis na die titel
Die Krugersdorpse skoonheid jaag die kroon na; maar vir 'n goeie doel.
Ontmoet vir Marcelle Allison, een van die top 100 Mevrou Suid-Afrika 2015 finialiste.
Die reis na die titel is ‘n pad wat Marcelle nog altyd geweet het sy moes loop, en hoop dat dit haar sal help met die vele liefdadigheidsprojekte waarmee sy besig is.
As ‘n ma van drie, het Marcelle besluit om die Mev Suid-Afrika kompetisie in te skryf om haar goedhartigheid en omgee te bevorder.
“Ek het al eerstehands gesien hoeveel nood daar in ons eie gemeenskap is.”
En vir haar gaan dit nie oor die aantreklike roem en glans nie, maar liefs om ‘n verskil in die gemeenskap te maak.
Onlangs het Marcelle en haar man, Chris, ‘n jongman in hulle huis ingeneem en hom ondersteun deur sy matriekjaar en met sy studies in Tegnologie.
“Dit was ‘n enorme seën om die pad saam met hom te kon loop,” vertel die skoonheid.
Tans is Marcelle betrokke by die liefdadigheidsorganisasie 12 Baskets waar hulle komberse na Malawi uitvoer en aan die inwoners verkoop teen ‘n spotgoedkoop prys, dus maak hulle geen wins.
Vir die Mev SA kompetisie word Marcelle, saam met die ander 99 semi-finaliste, uitgedaag om koppies koffie of tee (Cuppa 4 Cansa) ten bate van die Kanker Vereeniging van Suid-Afrika (Kansa) te verkoop.
“Kansa lê baie na aan my hart, siende dat ek my ma aan kanker afgestaan het,” vertel sy.
Omdat sy die kanker-pad saam haar ma gestap het verstaan sy die hartseer en uitdagings wat gepaard met die siekte gaan.
Die Krugersdorpse skoonheid sien uit na die Kansa Gala-ete wat op 24 April by Emperors Palace plaasvind en waar die top 25 finaliste aangekondig word.
Behalwe dat Marcelle sowat R5 000 se fondse moet insamel en ‘n gasvrou moet speel vir ‘n tafel van 10 vir die dinee, het sy die ondersteuning van die gemeenskap broodnodig.
“Ek het stemme nodig,” sê sy ernstig.
Marcelle glo sterk, “dit is in die oomblikke van jou keuses waar jou toekoms bewind word”.
Volg haar op facebook en stem vir haar op die Mev Suid-Afrika facebook-blad www.facebook.com/MrsSouthAfrica of sms haar naam na 35959 vir ‘n stem.
