[VIDEOS + FOTO’s] Noordheuwel lapa brand tot die grond af
Derduisende rande se skade is vanoggend in Fiskstraat aangerig toe 'n lapa aan die brand geraak het.
Die oorsaak van ‘n brand is nog onbekend nadat ‘n lapa vanoggend in Fiskstraat, Noordheuwel aan die brand geraak het en derduisende rande se skade aangerig het.
Christy du Toit en haar dogter Jiné, die bure, was net reg om te ry toe hulle die rook langsaan hulle erf raaksien wat gevolg is deur vlamme.
“Ek het dadelik na my tuinjong geskree om die tuinslang te kry en te begin natspuit terwyl ek die brandweer ontbied het,” het sy gesê
Brandweerdienste van die Watch Tower sowel as Krugersdorp is na die toneel ontbied waar daar toe vasgestel is dat ‘n lapa aan die aangrensende huis aan die agterkant ook besig is om vlam te vat.
Daar het huiseienaar Konrad Heunes, 30, klaar met sy vuurblusser reggestaan en die vlamme verhoed om ernstige skade aan te rig.
“Ek en my vrou was in die huis toe sy vir my skree die bure se lapa is aan die brand. Ek het toe met my vuurblusser uitgehardloop om te kyk of ek iets kon uitrig, maar dit was reeds te laat – daar was niks wat ek verder kon doen nie.”
Hy het ook die brandweer ontbied en prys hulle vir hulle flinke optrede.
Die skade aan die lapa word teen sowat R10 000 beraam.
Eienaar van die lapa waar die brand vanuit ontstaan het reken die skade kan amper R200 000 wees omdat die hele lapa verwoes is en ‘n gedeelte van die huis ook skade opgedoen het.
“Ek het nie ‘n idee wat kon skeefloop nie, ek was by die werk toe ek die oproep kry dat die lapa aan die brand geraak het,” het hy op voorwaarde van anonimiteit gesê.
Hy en sy vrou asook hulle twee seuns sal voorlopig eers by sy ma gaan bly totdat die brandweer ondersoek instel sowel as die skade aan die huis herstel is.
“Ek is natuurlik baie ontsteld oor wat gebeur het.”
Gerhardt Nieuwoudt, bevelvoerder van die Wes-Rand-distriksmunisipaliteit se nooddienste het aan die News gesê ‘n ondersoek sal van stapel gestuur word om die werklike oorsaak te kan vasstel.
