Rant-en-Dal huisbrand: Vrou het weer hoop en krag

Magda Erasmus het tydens ‘n verwoestende brand in Oktober nie net haar huis verloor nie, maar ook waardevolle items wat kosbare herinneringe aan haar oorlede man en familie ingehou het. Maar Magda se swaarkry het reeds lank voor die tragedie begin.

Sy en haar man het in 2007 na die spoghuis in Sparrow Cresent verhuis. Na sy afsterwe het sy as staatspensioenaris gesukkel om by te bly met die huis se onderhoud en grondbelasting. As gevolg hiervan wou sy die huis in die mark sit en het reeds vir maande ook sonder krag gesit.

Peter Parau van Ranch Electric en raadslid Aloysha Jooste het egter onlangs tot haar redding gekom.

Parau het aangebied om Magda se elektrisiteit in die huis reg te maak op sy eie onkoste nadat die huis amper heeltemal afgebrand het en Jooste is saam met haar na die munisipaliteit om Erasmus te laat registreer as hulpbehoewend.

• Lees ook: Rant-en-Dal huisbrand: Teer herinneringe ook in brand vernietig

Op 10 November het die ligte toe weer helder gebrand by die spoghuis in Sparrow Cresent.

Na die brand is Magda besig om stadig maar seker weer op te vang, maar haar huis is steeds swart van die roet. Sy het dus hulp nodig om haar tuin te herstel en sukkel soms om haar drie honde en ‘n kat te voer, so kos vir haar diere is altyd welkom.

• Lees ook: Rant-en-Dal fires: A community comes together

Jooste het verduidelik dat daar nog so baie is wat gedoen moet word en dat dit nog ‘n lang pad is wat voorlê.

“Nege maande later en ek het weer die voorreg om krag te hê. Baie dankie vir Peter en sy span, asook Aloysha. Julle het weer lig in my lewe voorsien. Ek waardeer dit opreg. Nou kan ek weer soos ‘n normale persoon warm water hê, die yskas gebruik, ligte aanskakel en krag hê om my foon te herlaai. Dit beteken ontsaglik baie vir my. Ek weet nie hoe ek julle kan bedank nie. Julle is wonderlik,” het Erasmus gesê.

Indien jy vir Magda Erasmus kan en wil help om weer op haar voete te kom en haar huis reg te kry, skakel haar by 082 573 7746.