Monnas krieketspeler verower nog ‘n 100-tal
Hy het die besondere hoogtepunt bereik toe Monnas se eerste krieketspan teen dié van Hoërskool Waterkloof die kolfblad op Saterdag, 17 Februarie aangedurf het.
Ethan Klassen, ‘n Graad 11-leerder by Hoërskool Monument (Monnas) het kop en skouers bo die res uitgestaan toe hy sy derde agtereenvolgende 100-tal gemoker het.
Hy het die besondere mylpaal bereik toe Monnas se eerstekrieketspan dié van Hoërskool Waterkloof op Saterdag, 17 Februarie aangedurf het.
As Monnas se eerstespan-paaltjiewagter en nommer 4-kolwer het hy in sy vyf kolfbeurte tydens die Finsbury-kompetisie reeds 357 lopies aangeteken teen ‘n kolfgemiddeld van 89,3 lopies per beurt van slegs 249 balle. Al dié tellings is aangeteken teen gerekende krieketskole in Suid-Afrika.
“Ethan speel ‘n groot rol as paaltjiewagter in Monnas se eerstespan. Hy het in die Finsbury-kompetisie reeds ses vangkanse agter die paaltjies asook twee stonkgeleenthede van sy draaiers af benut,” het George Engelbrecht, Monnas-kriekethoof gesê.
Dit wil ook voorkom of Ethan baie lekker saam met die junior kolwer, Marno Potgieter kolf. Hulle het al vir twee groot vennootskappe gesorg, insluitend 113 lopies teen Hoër Volkskool Potchefstroom en 84 teen Hoërskool Waterkloof.
Ethan se grootste droom is om so lank moontlik goed te vaar in sy skool se eerstespan asook om 10 honderdtalle in die 2018-seisoen aan te teken.
“My korttermyn-doelwit is om die Gauteng o.17/ 19-skolespan by Krieket Suid-Afrika se Nasionale Krieketweek in Desember te verteenwoordig en dan nog lank vir die Randfontein Krieketklub se Premierliga-span te speel. Ek wil dan natuurlik ook eendag vir die Proteas speel,” het hy ten slotte vertel.
Het jy dalk meer inligting rakende dié storie? Stuur gerus vir ons ‘n e-pos na krugersdorpnews@caxton.co.za of skakel ons by 011 955 1130.
Vir daaglikse gratis gemeenskapsnuus aan die Wes-Rand, besoek ook ons susterwebtuistes:
Besoek ook ons Facebook, Twitter en Instagram blaaie om jou stem te laat tel!
