Van afslaan tot op die setperk was Laerskool Kenmare se jaarlikse gholfdag ’n voltreffer – en dit alles vir ’n goeie doel.

Volgens Kennies se sport-, kultuur- en bemarkingshoof, Peter du Toit, het 36 vierballe met altesaam 144 deelnemers aan die fondsinsameling deelgeneem wat op 11 September by die Krugersdorp Gholfbaan aangebied was.

Die fondse wat ingesamel is, sal vir verskeie doeleindes aangewend word.

“Die geld gaan nie net vir die skool nie, maar ook na ons liefdadigheidsprojek Kennies leef liefde en ons voedingskema. Daar is ook ’n Springboktrui met al die huidige Bokke se handtekeninge opgeveil, waarvan die opbrengs geskenk gaan word aan ons leerder wat vroeër vanjaar deur ’n ponie gebyt is,” verduidelik hy.

Peter het benadruk dat die gemeenskap baie vir die skool doen en dat hierdie dag ’n manier is om iets terug te gee.

Daar was verskeie kompetisies regdeur die dag. Uit die 19 borge het twee elk ’n putjie geborg waar spelers ’n motor kon wen indien hulle ’n gaatjie-in-een geslaan het. Daar was ook ’n speletjie waar deelnemers op die setperk ’n verversing kon wen deur dit raak te put.

“Ons sien elke jaar uit na dié dag, omdat dit ’n geleentheid is om saam met die gemeenskap tyd te spandeer,” het Peter afgesluit.