Die 175km-wedren bestaan uit vier skofte en afsonderlike roetes, waar die eerste roete deur ontbyt, tweede roete deur middagete, derde roete met teetyd en vierde roete met ‘n potjiekos aandete en vermaak in die feestent afgesluit word.
Brandon Downes het algehele eersteplek in die 175km-resies gevat en het die pak gelei in die eerste skof van 53km en dit in 1:19:16 voltooi. Hy voltooi die tweede skof se 48km in 01:10:25 en het die derde skof, 52km op die Vivo pad in 1:17:43 voltooi.

Die vierde skof is ‘n 22km-roete wat ‘n steil klim na Otto’s Hoogte insluit voor daar terug na Makhado afdraende gejaag word. Downes voltooi die skof in 35:47 vir die algehele eersteplek. In die vroue-afdeling het Sonica Klopper eerste oor die eindstreep getrap. sy voltooi die eerste skof in 1:33:51, tweede skof in 1:21:01, derde skof in 1:44:06 en finale skof in 43:35. Anna Clemons vat tweedeplek in die vroue-afdeling en eersteplek in die veteraankategorie deur die roete in 5:21:20 klaar te trap.

Op die TA-tandemfiets het Jacobus van Dyk en Pieter Avenant die voortou gevat en die resies met ‘n tyd van 4:37:35 voltooi om die eersteplek op die podium vol te staan.
Caroline en Mark Farmer vat eersteplek in die TC Tandem-afdeling en voltooi die roete in 5:15:14. Tweedeplek in die afdeling is deur Zelda en Walt Katzke gevat. Hulle voltooi die wedren in 5:20:13.
Die 70km-padfietswedren is deur junior ryer Musa Mabuza gewen in ‘n tyd van 2:04:43. Eliz-Mari Pretorius is die eerste vrou oor die eindstreep en voltooi die resies in 2:08:48.

Lees ook: Speke sing by nuwe Magoebaskloof-roete

Hugh Robert Moubray is die eerste e-fiets oor die eindstreep en wen die afdeling met ‘n tyd van 2:23:32.
In die 35km-padfietswedren het Waldo Strijdom die algehele eersteplek gevat en die resies in 1:08:22 voltooi. Daniel Lee is in tweedeplek met ‘n tyd van 1:11:07 gevolg deur Matthew Lee wat die resies in 1:13:12 voltooi het. Al drie die fietsryers het in die jeug-afdeling gekompeteer. Elite-ryer, Karla van Zyl is die eerste vrou oor die eindstreep in die 35km resies en sy voltooi die resies in 1:14:54.

Jenna Adlam vat die tweedeplek met ‘n tyd van 1:17:09.
Stanley Thompson, wedrendirekteur van die Kremetart, vertel dat dit ‘n voorreg is om ‘n resies van dié gehalte aan te bied die afgelope dertig jaar.
“Ons het oor die jare geleer uit ons foute en geleer dat dit sonder borge nie moontlik is nie, Limpopo Toerisme en veral ons hoofborg, ZZ2, het ons hier goed bygestaan.

Ons het by die wenresep gehou, vier skofte wat met etes aangevul word. Die vermaak wat die aand by die feestent aangebied word is veral ‘n trekpleister vir die Gautengse fietsryers om die lang pad na Makhado aan te vat vir die Kremetart,” vertel Thompson.