Merensky-boogskuts skitter by SA’s
Vier boogskuts van Merensky Landbou Akademie het oor drie dae aan die Suid-Afrikaanse Nasionale Veldboogskietkampioenskappe in Bloemfontein deelgeneem.
TZANEEN – Vier Merensky Landbou Akademie-boogskuts het van 20 tot 22 Maart aan die Suid-Afrikaanse nasionale veldboogskietkampioenskappe deelgeneem.
Die kampioenskap het oor drie dae buite Bloemfontein gestrek, met deelnemers wat hul vaardighede in veld-, jagter- en dierteikens oor verskillende afstande getoets het.
Op Vrydag het hulle die standard veld-ronde geskiet, wat vier pyle per teiken behels, met 28 teikens op afstande tussen ses jaart en 50 jaart vir juniors en tot 80 jaart vir jong volwassenes.
Met ’n kolskoot wat vyf punte tel, was die maksimum telling 560. Saterdag het hulle die jagtersronde geskiet, wat baie dieselfde is, maar met meer onreëlmatige afstande. Sondag het hulle die diereronde geskiet, wat op 28 verskillende papierteikens geskiet word.
Uitstaande prestasies:
- Henk Meyer – eerste (jong volwasse boogjagter onbeperk) én nasionale kleure
- Nathan Swanepoel – eerste (junior boogjagter onbeperk) én nasionale kleure
- Zelke Kruger – eerste (junior vroue boogjagter onbeperk) én nasionale kleure
- Borman van der Westhuizen – derde (junior boogjagter onbeperk)
Zelke, Nathan en Borman het ook nuwe persoonlike beste tellings tydens die kampioenskap behaal.
Die volgende kompetisie is die Limpopo Noord-veldkompetisie op 25 April by Shikwaru Lodge.
