Mnr. Van Wyk het ernstige voetbeserings opgedoen toe ‘n rukwind hom opgepluk het tydens die landingsproses.

Uit sy hospitaalbed by Life Midmed Hospitaal, waar hy tot vroeg hierdie week vir ‘n bloedklont in die long behandel is, het hy vertel van die fratsongeluk.

Mnr. Van Wyk sê dit was hy en sy vrou, Elizabeth, se eerste solospronge as lede van die Witbank Valskermklub.

Me. Van Wyk het eerste geland en het haar kamera gegryp om foto’s te neem terwyl haar man afgekom het om te land.

Deur die kameralens het sy gesien hoe hy net meters van die grond af deur ‘n rukwind opgepluk en met geweld op die grond gegooi word.

Mnr. Van Wyk het op sy voete geland en het met die harde slag sy linkerenkel en -hak gebreek, asook ligamente geskeur. Hy het ook twee tone gebreek en ligamente geskeur op sy regtervoet.

Hy is direk na die ongeluk by die Kosmos Hospitaal behandel, waarna hy na die Moot Hospitaal oorgeplaas is. Mnr. Van Wyk is vyf dae in die hospitaal behandel vir sy beserings en ontslaan.

Na ‘n paar dae tuis het hy siek geword en is opgeneem in die Wilgers Hospitaal waar bepaal is dat hy ‘n bloedklont in die long het. Hy is verlede week na die Life Midmed Hospitaal oorgeplaas, sodat hy nader aan sy gesin kon wees. Hy is Dinsdag ontslaan.

Weens die ernstige aard van sy beserings, sal mnr. Van Wyk nooit weer valskermspring as stokperdjie kan beoefen nie. Me. Van Wyk sê sy besluit nog of sy wil aangaan met die sport, aangesien hulle dit sáám beoefen het.