Nelspruiter Megan Botha wen silwer in Afrika padwedren
Suid-Afrika se vroue ryg die medaljes in nadat die land aanvanklik ’n medaljedroogte beleef het.
Suid-Afrika het vanmiddag ’n ongekende medaljeoes gehad in die Afrika fietsry kampioenskappe met twee goue medaljes, twee silwer en ’n brons.
Een van die uitstaande vertonings was die van Nelspruit se Megan Botha.
Sy het ’n silwer medalje in die o.23 vroue afdeling gewen, met haar spanmaat, Marzaan Mellett, wat goud ingepalm het.
Hulle was algeheel vyfde en sesde in die 122 kilometer padwedren in Kenia.
Oud Middelburger Magda Nieuwoudt is die vroue Afrika fietsry kampioen vir elite vroue.
Sy het die padwedren in 3:28:50 gewen en stap met ’n goue medalje weg.
Dit is haar tweede goue medalje nadat sy ook deel was van die gemengde span wat ’n goue medalje verower het.
Lisa Bone het ’n silwer medalje vir Suid-Afrika verower en Tiffany Keep brons.
Rwanda spog met die vierde plek. Diane Ingabire het ’n podiumplek net-net misgeloop.
Sy is gevolg deur Mellett en Botha.
Die mans padwedren vind more plaas waar die twee ervare Middelburgers, Gustav Basson en Thokozani Mahlangu op die inskrywingslys is saam met Simon Ferreira, Callum Ormiston, Danival Matthews, Rhys Burrell, Wijan Nieuwoudt, Emile van Niekerk, Ryno Schutte en Joshua Dike.
