Hannes Joubert was ware staatmaker by rugbyklub
Wanneer die Witbank Rugbyklub keurders die name van die senior reserwe span in die sewentiger- en tagtigerjare neergeskryf het, was die eerste naam sekerlik Hannes Joubert.
Joubert was ’n stil reus maar ’n ware klubman en lojale speler.
Hy het natuurlik ook in die skadu gespeel van die twee Suidoos-Transvaal slotte, Vleis van Zyl en Bertus van Eeden.
Nadat hy ’n tyd lank met sy hart gesukkel het, is hy op 17 Augustus skielik oorlede.
Sy dankdiens het Maandag uit die Klipkerk op Witbank plaasgevind.
Sy kleindogter, Chantal Viljoen, het ’n roerende gedig voorgelees by die diens, wat deur verskeie van sy oud spanmaats van Witbank Rugbyklub bygewoon is. Onder hulle was Jan Short, Christie Harris, Gert la Grange, Tonie van Tonder, Bertus van Eeden, Adri Prinsloo, Fanie Vermaak en Dirk Meyer.
Tobie van den Bergh, wat destyds verskeie berigte namens die Witbank Nuus oor Joubert geskryf het, het ook die diens bygewoon.
La Grange, wat op losskakel vir Witbank Rugbyklub en Suidoos-Transvaal uitgedraf het, het gesê dat Joubert vir die klub gespeel het in die jare toe rugby nog een groot familie was, waar die spelers se kinders langs die rugbyveld grootgeword het.
Hy hou die oudspelers bymekaar met gereelde besoeke aan spelers wat siek of in nood is en samekomste soos verlede week se kuier by Dirk Meyer.
•Joubert het, nadat hy ophou rugby speel het, sewe Comrades marathonne voltooi.
•Hy laat sy vrou Christine en kinders en kleinkinders agter.
