News

Vyandige renosterbulle takel mekaar wéér

Ubhetyan O Africa se twee renosterbulle, wat berug is vir baklei nadat die een bul die ander verlede jaar oor ’n kloof op die plaas gestoot het, het weer vir groot drama gesorg toe hulle mekaar wéér getakel het.

June 22, 2019

Gerhard Rheeder 1 minute read

So lyk ’n bakkie wat Maandag op die verkeerde tyd, op die verkeerde plek op Ubhetyan O Africa was, toe twee renosterbulle, wat berug is vir hul vyandigheid mekaar wéér op die wildsplaas getakel het.

Werknemers van die wildsplaas was op patrollie toe hulle kollig die twee renosterbulle gevang het waar hulle naby die lodge baklei.
Die bulle het mekaar in alle windrigtings gestamp en die bakleiery het vinnig tot by die wildbewaarders in die bakkie beweeg.

Die renosters het mekaar so gestamp dat die bakkie getref is.

Bewaarders het gou by die passasierskant uitgespring en lodge toe gehardloop toe die bulle die bestuurdersdeur begin verwoes het.
Niemand, insluitende die bulle, is in die harwar beseer nie.

Ubhetyan O Africa eienaar mnr. Deon Cornelius sê dat dit ’n geval was van “verkeerde tyd, verkeerde plek,” vir die bewaarders en die bakkie.

Die plaas is ’n oase van wild, en word deur bewaringsagentskappe gebruik vir rehabilitasie van onder meer luiperds en leeus.

Daar was ook onlangs twee voorvalle waar mens en dier gebots het.

• Op 6 Junie is die 2-jarige Courtney Ntimane deur ’n luiperd dood gebyt by die wildtuin se Malelane Tegniesedienste woonkwartiere.
Die dier en haar welpie is vankand gemaak na die aanval.

• Verlede week het ’n olifantkoei ’n kar in die Krugerpark gestorm en beskadig. Gelukkig is die vrou en haar ma nie beseer nie.