Die voorval het op die plaas Eensome naby Roossenekal plaasgevind.

Mnr. Willem Daniel Ackermann het glo ‘n lig binne sy Honda CRV voertuig gesien, wat op sy perseel parkeer was.
Hy het nader gegaan en ‘n onbekende man binne die kar gesien.

Volgens mnr. Markus Basson, wat vir vyf jaar die voorsitter van die Plaasveiligheidsforum vir Roossenekal was, het mnr. Ackermann die man gevra, wie hy is en wat hy soek.

Volgens die polisie het die verdagte uit die voertuig geklim en na mnr. Ackermann toe beweeg.
Die polisie sê dat daar vyf skote in totaal gevuur is en dat die verdagte noodlottig gewond is.

Volgens mnr. Basson is daar ook ‘n mes op die toneel gekry.

Die ambulansdienste het die verdagte op toneel dood verklaar.

Mnr. Ackermann is gearresteer op die aanklag van moord en het reeds in Groblersdal se landdroshof verskyn.

Die saak is uitgestel tot ’n latere datum.