Alzu het tydens sy jaarlikse Pensioenarisdag hulde gebring aan die ouer generasie wat ’n belangrike deel van die Alzu-gemeenskap vorm.

Inwoners van Alzu se plase op Kwaggafontein en Wonderfontein is na die geleentheid genooi, asook voormalige inwoners wat weens mynboubedrywighede na Rockdale verskuif is.

Baie van die gaste het destyds saam met oom Zulu du Toit op die plaas begin werk. Hulle is reeds afgetree, terwyl hulle kinders en kleinkinders vandag steeds by Alzu werk.

Ndebele-erfenis is ’n belangrike deel van die gemeenskap se identiteit. Gaste is met Ndebele-danse vermaak deur Alzu se kleuterskool, Alzu se seuns en dogters, en die Beestepan Hoërskool se dansgroep.
Spesiale erkenning is aan hoofman Lemmy Mahlangu en hoofman Lucky Mabena gegee. Hulle het die verrigtinge as eregaste bygewoon.

Pastoor Martha Mabuza het die geleentheid met ’n kragtige Christelike boodskap geseën.
Sarah Jiyane, wat self by Alzu grootgeword het, het die ouer generasie bedank vir die rol wat hulle in die opvoeding van die jeug gespeel het.

Die dag is gevul met sang, dans en samesyn, en is met ’n heerlike tradisionele maaltyd afgesluit.