Daar is laat gistermiddag ’n waarskuwing uitgereik aan Olifants River Lodge na die sluise oopgemaak is, wat die gemeenskap gewaarsku het om te ontruim voor die water in die Olifants hulle bereik.

Jacky Smith, van Olifants River Lodge, het bevestig dat die waarskuwing hulle bereik het, maar het gesê dat die lodge veilig is en dat die uitgang op ’n heuwel is terwyl die rivier onder hulle lê.

Sy het die versekering gegee dat die lodge nog oop is vir besigheid en veilig is, maar het gesê dat die waarskuwing op die Presidentsrus inwoners gemik was.

Teen 18:30 gisteraand is daar bevestig dat die laagwaterbrug, wat toegang gee tot die “Eiland” buurt toe is onder die water, en dat daar wel inwoners is wat vasgevang is op die eiland.

Een van die inwoners het gesê dat hulle tydens ’n vorige geleentheid, toe die Witbankdam se sluise oopgemaak is, vir drie dae van die buitewêreld afgesluit was met die bruggie wat oorstroom het.