Volgens TRAC se segsvrou, Solange Soares, was een van hul reaksievoertuie op ’n toneel waar ’n polisievoertuig beheer verloor en deur die sperrelings gejaag het. Drie persone is tydens die eerste ongeluk beseer. Dit is egter nie bekend van waar die polisievoertuig afkomstig was nie.

Die TRAC voertuig het in die noodbaan gestaan toe ’n tweede polisievoertuig om die draai kom, beheer verloor en met die stilstaande voertuig bots.

Wonder bo wonder het die bestuurder van die voertuig, wat die perdewaentjie gesleep het, daarin geslaag om te verhoed dat dit omslaan. Die Nelspruit Dierebeskermingsvereniging het hul na die toneel gehaas, om na die welstand van die perde te verneem.

Me. Soares sê dat die pad vir ’n geruime tyd gesluit was, sodat ’n veearts die diere kon ondersoek en seker maak dat hulle nie ernstig beseer is nie. Die perde is daarna in ’n ander waentjie, wat na die toneel ontbied is, gelaai. Niemand anders het beserings opgedoen nie.

Die Nelspruit DBV het in ’n Facebookplasing gesê dat hulle die Middelburg berede-eenheid wil prys vir hul goed versorgde perde en vir hoe sagkens hulle met die diere gewerk het.