Die gerugte volg kort op die hakke van onlangse fopnuus dat vier persone in eMalahleni positief getoets het vir die koronavirus en in die Witbank Hospitaal behandel word.

Die LP vir die Departement Gesondheid in Mpumalanga, Sasekani Manzini, het bevestig dat daar tans geen gevalle van die virus in die provinsie aangemeld is nie.

Die Departement van Gesondheid het onlangs hospitale in elke provinsie aangewys wat as isolasiesentrums sal dien waarheen pasiënte wat positief toets vir COVID-19 heen gestuur sal word. Geen gevalle sal by ander hospitale opgeneem word nie.

Die Rob Ferreira Provinsiale Hospitaal in Mbombela is as Mpumalanga se isolasiesentrum aangewys.

Om dop te hou hoeveel gevalle daar wêreldwyd aangemeld is, watter lande geaffekteer word en vir inligting soos hoeveel sterfgevalle daar in elke land is, gaan na die skakel www.worldometers.info/coronavirus.

Volgens die webwerf en ook gister tydens ’n persverklaring deur die Minister van Gesondheid, dr Zweli Mkhize, is daar tans sewe bevestigde gevalle van mense wat positief getoets het vir COVID-19 in Suid-Afrika. Al die mense was op dieselfde toer na Italië.

Besoek die Nasionale Instituut vir Oordraagbare Siektes se webwerf www.nicd.ac.za waar alle plaaslike persverklarings gepubliseer word.