Die motoris (wat verkies om anoniem te bly) sê hy het kort na vyf op die N11 (Loskoppad) in die rigting van Middelburg gery.

“Ek het hulle nie dadelik gesien nie, maar die volgende oomblik het die klippe my kar getref.”

Hy sê hy kon in die verte iets soos vlamme sien, maar nie die mense gesien wat sy Fiat met klippe gegooi het nie. “Toe ek oor die bult kom, is my kar gegooi.”

In ’n poging om tussen die mense, wat op daardie stadium toe baie naby sy kar was, weg te kom, het hy op hulle afgejaag en het hulle geepad.
Eers toe dit lig word en by ’n veilige plek waar hy kon stop, kon hy presies kyk wat die skade op sy kar is.

Van die voertuig se pasassiersruite is uitgegooi, die voorruit is gekraak, ’n karspieëltjie is beskadig en op die bakwerk is ook duike waar klippe dit getref het.

Hy weet nie op hierdie stadium wat die totale omvang van die skade is nie, maar glo dit gaan duisende rande beloop.