Daar is die afgelope tyd berig oor die lot van vlieënier Rudolf Lubbe en ander Suid-Afrikaners, wat gespook het om van die eiland paradys terug by die huis te kom, weens die inperkingsperiode en die gepaardgaande verbod op internasionale vlugte.

Met finansiële bystand uit talle oorde en hulp van minstens vier verskillende lande, kon die groep uiteindelik op 11 April terugvlieg huistoe. Na hul aankoms in Suid-Afrika is die groep na ’n kwarantyn fasiliteit in Midrand geneem en getoets vir Covid-19. Drie dae later het mnr. Lubbe die goeie nuus gekry dat hy negatief getoets het en toegelaat sal word om na sy familie te reis.

Van die 40 wat getoets is, het 11 toetse onbeslis teruggekom. Dit beteken dat terwyl 29 lede van die groep kon huistoe gaan, 11 mense moes agterbly omdat hulle weer getoets moes word.
Een van die ongelukkiges, is Erlo Eksteen, seun van plaaslike dokter Deon Eksteen. Die jong mnr. Eksteen het soos mnr. Lubbe as vlieënier in Maldives gewerk.

Rindia Eksteen, Erlo se ma, sê dat sy baie ongelukkig is omdat haar kind nog nie by die huis is nie.
“Hy sit in ’n piepklein kamertjie met ’n televisie wat nie werk nie. Hy het nie ’n Suid-Afrikaanse dubbelprop nie, so sy selfoon en rekenaar is pap,” sê me. Eksteen. Sy sê dat hulle angstig wag vir die uitslae van die nuwe toetse.