Me. Johanna Wasserman (69) het huilend vir www.mobserver.co.za vertel dat sy haar huis in ’n totale chaos gevind het.

“Hulle het alles uitgegooi opsoek na geld. Hulle het ook my wapen gevat!”

Me. Wasserman, sekretaresse van die Banke Boerevereniging, bly op die plaas Immanuel, langs die Banke Boeresaal.

Sy het vanoggend omstreeks 10:00 op die plaas gery en was teen 12:00 tuis.

In hierdie tyd het die booswigte die badkamervenster oopforseer om toegang tot die huis te verkry.

Nadat hulle die hele huis deursoek het vir geld en wapens, het hulle met sleutels, wat hulle in die huis gekry het, by die agterdeur uit gevlug.

Me. Wasserman sê haar honde was baie senuweeagtig toe sy tuiskom, maar hulle is gelukkig nie beseer nie.

Sy weet op hierdie stadium nog nie of daar enige ander artikels in die huis gesteel is nie, aangesien sy nog vir die polisie gewag het.

*Riemtelegramme het die rondte gedoen dat dit ’n plaasaanval was, maar me. Wasserman sê die inbrekers was gelukkig reeds weg toe sy daar aankom.