Die wispelturige weer waaraan inwoners nou al gewoond geraak het, gaan die Middelburg-omgewing vanaf môreoggend weer aan die keel gryp. Dit is darem nog nie nodig om weer die warmkomberse uit te haal nie, maar hou die sambrele gereed!
Daar wag beslis nog ’n koue dag, maar heerlike somertemperature gaan daarna aan die orde van die dag wees.
85%-kans op reën
Vrydag, 4 September, voorspel AccuWeather ’n maksimum van 23°, met oggendtemperature op 8°. Daar is ’n 85%-kans op reën, terwyl dit ook bewolk en winderig gaan wees.
Saterdag is ’n sonnige dag met temperature op 8° en 21°, maar dit gaan steeds winderig wees.
Sondag gaan dit bewolk wees met ’n 65%-kans op ’n donderstorm in die middag.
Dit gaan ’n onaangename 8° en 17° wees Maandag, met ’n reënbui in die oggend en die wind wat steeds pla.
Somer behoorlik terug
Dinsdag keer die somersweer terug met temperature van 12° en 24°.
Woensdag word 26° verwag en Donderdag is dit weer lekker sonnig op 25°.
Teen Vrydag is die somer behoorlik terug met temperature van 11° en 26°.
