Daar is Sondag by Life Midmed gebid vir die vinnige herstel van pasiënte, en die beskerming van ons mediese werkers, nadat boodskappe op sosiale media gesirkuleer is dat gesondheidswerkers swaar kry as gevolg van die hoë infeksie getalle.

Die Life Midmed Covid-19 eenheid is vol, met oor die 45 pasiënte waarvan 15 in die intensiewe eenheid is. Verder is daar oor die 33 personeellede wat positief getoets het, en baie ander wat nog wag vir hulle toetsuitslae.

Hospitaalbestuurder by Life MidMed, mnr. Hennie Viljoen, het bevestig dat baie van hulle personeel siek is. Hy het verduidelik dat die personeel geensins betrokke is by die Covid-19 eenheid nie, en dat hulle vermoed dat die infeksies buite die werksplek plaasvind.

Ten spyte van die siek personeel, is alles onder beheer en mnr. Viljoen verseker dat die sale deeglik skoon gemaak word, en dat toegang streng beperk word.

Hy sê dat die personeel by die hospitaal die gemeenskap se ondersteuning waardeer. Daar is selfs ’n groep vroue wat geskenkpakkies saamstel vir die dokters en verpleegsters, om hulle te bedank.

“Ons wil ’n beroep doen op inwoners om sover moontlik by die huis te bly,” het mnr. Viljoen gesê.

“Verder is almal by Life Midmed nog positief, nie Covid-19 positief nie, maar wel positief.”