Alles het begin toe ’n man met sy voertuig afgejaag het op ’n lid van die polisie se speurtak.

Sersant Godfrey Miyendze het vanaf die polisiestasie in die rigting van Laerskool Julian Muller gestap, toe ’n voertuig op hom begin afry.
Hy het begin hardloop en om die hoek in Robertsonlaan by Herfsakker af gehardloop, in ’n poging om uit die voertuig se pad te bly.

Die man in die voertuig het skielik met sy voertuig omgedraai en reguit op Sersant Miyendze afgejaag.
Sersant Miyendze het drie skote op die voertuig gevuur, maar die bestuurder het net vinniger gery.

Die man het Sersant Miyendze deur die muur van die ouetehuis gedruk.

Die voertuig het tot stilstand geruk en die lawaai het deur die ouetehuis gedreun.

Die man het na bewering uit die voertuig geklim en Sersant Miyendze met ’n baksteen oor die kop geslaan.

Inwoners van Herfsakker het Gunmar Sekuriteit en Groblersdal polisiestasie gekontak.

Polisielede het na die toneel gehaas en die man in hegtenis geneem, waarna Sersant Miyendze na die naaste hospitaal vervoer is deur Gunmar Sekuriteit/LowMed EMS.

Sersant Miyendze word tans in die Life Midmed Hospitaal in Middelburg behandel en het reeds Sondag ’n operasie ondergaan vir ’n erge fraktuur aan sy been.

Samson Kgowa (38) het Maandag in die Groblersdal Landdroshof verskyn op aanklag van poging tot moord. Die saak is uitgestel na Woensdag, 19 Augustus vir ’n borgaansoek.

Volgens Stanley Magaela, polisiewoordvoerder, is die rede vir die man se aanval op Sersant Miyendze onbekend.

Omstanders beweer egter dat die aanval plaasgevind het oor ’n vrou.