’n Kanonkop inwoner het ander gewaarsku om op die uitkyk vir die diewe te wees, nadat iemand deur die nag van sy plaveiselstene gesteel het.

Die man, wat in Sipresstraat woon, sê dat hy elke aand sy hek gaan sluit en dit gisteraand 19:00 oudergewoonte gedoen het. Toe hy vanoggend sy hek oopsluit, het hy opgemerk dat daar ’n stuk van sy plaveisel gelig is. Daar was niemand verdags in die straat nie. Met die terugpak was daar tien stene weg.

“Ek weet nie of ek hulle skrik op die lyf gejaag het dat hulle gevlug het en of hulle my huis probeer merk het nie. Maar ander inwoners moet maar versigtig wees,” sê die man, wat anoniem wil bly.

• Daar is al voorheen berig hoe boewe wat wiele van voertuie af steel, van plaveiselstene gebruik maak om die voertuig op te laat staan.

In Augustus het Gerhard Beukes vertel hoe hy sy bakkie op plaveiselstene aangetref het, toe hy een oggend wou werk toe ry. Sy lewensmaat, Belinda Wolfaardt, se Jeep se wiele is ook afgesteel. Videomateriaal het gewys hoe die boewe meer as ’n uur spandeer het om die wiele af te steel.

Daar was soortgelyke voorvalle in Helen Josephstraat, Uitbreiding 24, Rockdale en ’n poging tot diefstal in Loeriestraat waar diewe ook stene by die bure gesteel het.