Duikers onttrek aan soektog na Malawiër
Die polisieduikers gaan nie verder soek na die oorskot van mnr. Henry Young Mikwanda (31) nie.
Mnr. Mikwanda, ’n Malawiër, het Saterdag by die Middelburgdam verdrink.
Die afgelope week het die polisie se watervleuel, duikspanne, honde-eenheid, bygestaan deur die span van die Nasionale Seereddings Instituut, Station 35 op eMalahleni, onverpoos na sy oorskot gesoek.
Die hoogte bo seespieël, onderwaterstrome, die koue en diep water en erge wind bemoeilik al die hele week die soektog.
Nadat die duikers vandag uitgekom het, het hulle besluit om die soektog in die water af te las. Polisielede sal egter bedags patrollies by die dam gaan ry om te kyk of sy liggaam opkom.
• Mnr. Mikwanda het die afgelope jaar vir mnr. Perrin O’Neill gewerk in Kanonkop. Hy was saam met mnr. O’Neill en ’n vriend Saterdag by die dam om ’n boot te toets wat mnr. O’Neill reggemaak het. By die diep baaigedeelte het hulle afgespring om te swem en het mnr. Mikwanda verdrink.
Vorige stories:
Nog geen teken van Malawiër wat verdrink
Drie honde vandag ingespan om na oorskot te soek
Vrou ‘sien’ waar verdrinkte man se liggaam in dam lê
