Mnr. Johnny Venter, algemene bestuurder van OH Frewin Drukkery, vertel dat daar twee aande na mekaar koperkabels van een van die lugversorgers aan die buitekant van die besigheid gesteel is.

Die skade is van so ’n aard dat die lugversorger vervang moet word teen ’n koste van R40 000. Hulle is tans besig met werk in die museum en die dak is tydelik oop gelos. Omstreeks 03:00 het CSC Tactical ’n alarm in die fabriek by OH Frewin Drukkery gekry. Dit was egter nie weens die boef aan die buitekant op die perseel nie, maar weens die vlermuise wat opsoek was na kos. Met reaksielede, Louis Zietsman en Richard Mabusela se aankoms, het hulle die verdagte agter palette tussen die OH Frewin en Middelburg Observer gebou, gesien.

“Hy het oor die hek gespring en tussen OH Frewin en die Middelburg Observer ingespring om weer koperkabels te sny, toe die alarm skielik afgaan met die vlermuise in die gebou. Hy kon nie vinnig genoeg wegkom nie en my lede het hom daar betrap,” het mnr. Ferdie Labuschagné (bestuurder van CSC Tactical) gesê.

Een van die reaksielede is ook in die gebou in om te kyk of alles reg is en het blitsig na sy wapen gereik toe daar skielik ’n “persoon” langs hom in ’n klein kamertjie staan.

Gelukkig was dit net die winkelpop!

Mnr. Labuschagné het saam met mnr. Dries Venter (Junior) deur die perseel gegaan om te kyk watter skade aangerig is. Volgens mnre. Labuschagné en Venter was die polisie ook binne minute op die toneel en wil hulle die lede daarvoor bedank. • Daar is ’n mes en ’n skroewedraaier in die verdagte se besit gevind.

• Sy naam kan nie op hierdie bekend gemaak word nie, omdat hy nog in die hof moet verskyn.