Sekuriteitsoffisier, Louis Zietsman, CSC Tactical, het gou sy hande gaan was in die badkamer van ’n vulstasie in Samora Machelstraat en het ingedagte die selfoon op die asblik gelos. Hy was net ’n blok weg van die vulstasie af, toe hy besef hy het sy foon vergeet en het terug gejaag. Die selfoon was egter skoonveld en niemand het ook die selfoon by die voorste kantoor ingehandig nie. Met die hulp van die bestuurder van CSC Tactical, Ferdie Labuschagné, het hulle met die Samsung Toep, “Find my Mobile” die spoor begin volg. Na ’n rukkie het hulle twee verdagtes op die hoek van Cowen Ntuli- en Walter Sisulustraat opgemerk, maar nie dadelik die sein gekry nie. Kort daarna het hulle dieselfde twee mans by die Irak Taxistaanplek gesien en die sein direk by hulle gekry. Maar al wat hulle aan die mans kon sien, was ’n pakkie Simba skyfies. Mnr. Zietsman het die een man herken wat hy vroeër by die vulstasie opgemerk het. Die oomblik toe die twee verdagtes hom sien, het die een die “Simba skyfies” onder ’n bakkie ingegooi by die deurloop vanaf Irak Taxistaanplek na Walter Sisulustraat en probeer vlug. Mnr. Zietsman was egter te vinnig. Hy het gesien dit is sy selfoon wat in die “Simba” skyfiepakkie toegedraai is en die een verdagte vasgetrek. • Die beskuldigde se naam kan nie gebruik word nie, omdat hy nog nie in die hof verskyn het nie.