Me. Belinda Kruger sê een van die eerste oproepe was van ’n slangnes met eiers wat oopgekrap is deur ’n likkewaan in die Kranspoort omgewing.

Die sewe eiers is na ’n lid van die herpetologiese vereniging geneem, waar dit sal uitbroei en die kleintjies hervestig word. Dit is onseker watter tipe slangeiers dit is.

•Op bykans dieselfde tyd is daar ’n rinkhals by Pienaardam Ontspanningsoord gevang.

Vroeg die oggend is ’n pofadder en later die dag ’n groot molslang gevang by die area waar die nuwe hospitaal gebou word. Die molslang het onder die buffer van ’n voertuig ingekruip en mnr. Jan Kruger moes die knewel gaan bevry.

Terwyl hy daar was, het die mense op die perseel vir hom ’n Nonnetjies-uil, wat baie swak was, gegee. Hulle het vir hom vertel dat die uil “net uit die lug uit geval het”.

Personeel van die Birds of Prey Rehabilitasiesentrum op Dullstroom het die uil kom haal om te kyk of hulle sy lewe kan red.

• Adj. Stoney Steenkamp (Middelburg Veediefstal en Bedreigde Spesie Eenheid) het verlede week ’n jong sekretarisvoël gered, wat met ’n stuk tou om sy poot aan ’n gewig vasgemaak by ’n tradisionele geneser in Delmas gekry is. Adj. Steenkamp is ook lid van die Middelburg Herpetologiese Vereniging.

Die span van Birds of Prey het alles probeer om die voël te red, maar hulle het vroeg hierdie week laat weet dat hy weens sy ontberinge gevrek het.