“Die Here was goed vir ons, want my ma en seuntjie het niks oorgekom nie,” het ’n nog geskokte me. Cornea Badenhorst pas gesê.

Sy was nog in die dorp, toe ’n lid van die gemeenskapspolisiëringsforum haar bel en sê die reuse palmboom by hul swembad brand. Van die bure het na hul huis gehardloop en haar ma, Cora Janse van Rensburg, wat in die woonstel bly, gevra om oop te maak, sodat hulle met ’n tuinslang die brandende boom kan blus.

Met me. Badenhorst se aankoms by haar huis, het sy die totale omvang van die skade gesien.

Die weerlig het die boom getref en dit aan die brand gesteek. Die straal het ook die kragboks raakgeslaan en is dwarsdeur die huis en woonstel waar alle elektriese artikels beskadig.

Die straal is uit by hul dag en nag skakelaar van die hekmotor en die ligte by die hek, waar die ligte bykans heeltemal afgeslaan is. Weens die hitte van die brandende boom het twee vensters gebars en agt ander vensters is gebreek toe van die brandende palmtakke dit getref het.

Me. Badenhorst sê dat haar seuntjie en ma getraumatiseer is deur die geweldige slag van die weerlig.