Diewe steel boer se trekker
Diewe het Sondag in die vroeë oggendure ’n trekker en spuit gesteel en in bosse versteek, maar nie rekening gehou met die goeie speurvernuf van ’n reaksie-offisier van Mid-Alarms nie.
Reaksie-offisier CP Kotze is vroeg uit na mnr. Graham Walsh se plaas op die Stoffbergpad nadat hulle Mid Alarms laat weet het dat die trekker en spuit gesteel is.
Mnr. Kotze sê volgens die spore wat hulle gevolg het, het een bakkie voor die trekker gery en ’n ander bakkie agter die trekker. Sowat 25km vanaf die plaas, is die Ford Trekker en spuit, sowat 25km vanaf die plaas, versteek tussen bosse reg langs die Stoffberpad gevind.
Buiten die trekker se battery, asook ’n ander trekkerbattery wat uit die stoor uit gesteel is, word niks anders vermis nie.
Die vermoede bestaan dat die booswigte die aand wou terugkeer om die trekker te kom haal.
• Die waarde van die trekker en spuit is sowat R320 000 en mnr. Walsh het mnr. Kotze en Mid Alarms bedank vir hul goeie ondersoekwerk om dit vir hom te vind.
