“Die huis het geskud, ’n gat het dwarsdeur ’n baksteenmuur geskiet en alles het ontplof,” vertel me. Tracey Williamson.

Hulle was vir meer as 10 dae sonder krag of water na die voorval. “Die elektrisiën en loodgieter het gesê dat dit net genade van Bo was dat ons huis nie afgebrand het nie.”

Hulle was weg vir ’n paar dae en is omstreeks middernag op 5 November deur die bure gebel om te hoor of alles reg is.
Na die geweldige donderslag het van die bure die skerp reuk van ’n elektriese brand gekry.

Niks kon die Williamsons voorberei op wat hulle met hul terugkeer gekry het nie.

Alle elektriese kabels en elektriese bokse en selfs die boorgat se kabels het ontplof, toe die weerlig die huis tref.

“Mense wat die huis opgepas het, sê die huis het heen en weer geskud van die slag!”

Muurproppe het uit die mure uit geskiet en ligte en kabels het aan die brand geraak.

Die smeltende ligte en kabels wat in die motorhuis uitgeskiet en aan die brand geraak het, het op hul Mazda CX5, wat toegesluit was in die motorhuis, geval en die kar se bakwerk beskadig.

Me. Williamson sê dat hulle eers teen hierdie week Woensdag krag en water gehad het.

Haar man, Pieter, sê alhoewel die skade op sowat R150 000 geraam word, is die finansiële skade niks as in ag geneem word wat sou gebeur het as hulle tuis was nie.

“Ja dit is ’n finansiële verlies, maar niemand is gelukkig beseer of dood nie.”

As hy moet terugkyk na die gebeure, is dit die goedhartigheid van die Middelburgers wat in die omgewing bly, wat hom altyd sal bybly.

“Ons het ’n goeie ondervinding midde in die slegte ondervinding gehad. Die mense was geweldig ondersteunend. Ons kon hulle krag en water gebruik en ons is selfs vir ete genooi!”

Die gesin bedank almal vir hul hulp en ondersteuning, asook die kontrakteur wat nog besig is met die herstelwerk.