Seun skuldig bevind vir wrede aanval op Roossenekal vroue
Die man wat verantwoordelik was vir ’n wrede plaasaanval in die Roossenekal omgewing is vandag skuldig bevind in die Groblersdal Streekhof.
Gina Otto en haar vriendin, Moeka Gravina, is op 24 Augustus oorval en aangehou. Hulle is vir ure gemartel en later langs die Lydenburgpad vir dood agter gelaat.
Me. Otto is tydens ’n soektog gevind en daar is gevrees dat me. Gravina dood is, omdat sy nie opgespoor kon word nie. Sy is die volgende dag deur twee polisielede opgespoor en toe per helikopter na Middelburg gehaas vir mediese behandeling.
Die vroue het later vertel hoe me. Otto gedreig is dat sy nie moet teruggaan plaas toe nie, omdat iemand haar dan beslis sou kom doodmaak.
Daar is destyds berig hoe die aanvallers in Lydenburg prostitute opgelaai het voordat hulle in ’n skietgeveg met die polisie betrokke was. Een van die aanvallers is dood geskiet terwyl Mthimunye daarin geslaag het om te vlug.
Oud speurder Sakkie Louwrens was destyds by die ondersoek en die soektog na Mthimunye betrokke. Mthimunye is uiteindelik gearresteer wat gelei het tot sy skuldigbevinding in die hof hierdie week.
Hy sal in Januarie gevonnis word.
