Koperdiewe steel ingevoerde koperkabel van R80 000
Koperdiewe het Vrydag in die vroeë oggendure by Mokse Engineering in die industriële gebied in Slegtkampstraat (Middelburg) ingebreek en skade van by die R100 000 aangerig.
Volgens me. Shaelyn Hubbal (bestuurder) het die diewe tussen 04:00-05:00 vanoggend ingebreek en ingevoerde koperkabels, ter waarde van R80 000 gesteel.
Met kaste en slotte wat oopgebreek is en twee groot kragopwekker batterye wat gesteel is daarby, skat hulle die omvang van die skade op sowat R100 000.
• Na die inbraak, het die personeel in die veld parallel met Slegtkampstraat gaan stap en sakke vol plastiek omhulsels wat gewoonlik om koperkabels gevind word, in die veld gekry.
Dit is ’n aanduiding dat hulle by talle ander besighede of huise ook koper gesteel en sommer net daar in die veld na inbrake die omhulsel van die koper afgehaal het.
• Hulle bedank graag die sekuriteitsoffisiere van Hawk Sekuriteit en lede van die Gemeenskapspolisiëringsforum vir hul hulp.
