Bekende sakeman sterf weens Covid
’n Bekende sakeman van Middelburg, mnr. Johan Odendaal (55), is vanoggend omstreeks 06:40 aan die Covid-19 virus oorlede.
“Johan het nie onderliggende siektes gehad nie. Hy was ’n sterk, perdfris man, wat die virus gekry het. Dis ’n wrede siekte. Hy maak nie onderskeid nie,” het mnr. Odendaal se vrou, Retha, gesê.
Beide sy en haar man het op 7 Januarie positief vir die virus getoets.
Binne ’n paar dae het sy suurstofvlakke begin daal en is hy per ambulans na die Life Midmed Hospitaal geneem.
Hy was sedert verlede Vrydag aan ’n ventilator in die intensiewe eenheid gekoppel en het hulle hom soms vir twee ure van die masjien probeer speen. Hy kon egter nie heeltemal afgehaal word nie.
Me. Odendaal onthou hartseer hoe haar man haar gister sewe keer probeer bel het, maar weens ’n probleem met sein, kon hulle nie met mekaar praat nie. “Hy wou so graag nog een keer net my gesig sien.”
Sy het gesê dat ons dorp ’n dinamiese, standvastige sakeman verloor het.
“Johan was die mees onbaatsugtige, hulpvaardigste mens. Hy sou homself te na gekom het om ander te help. Hy was die beste pappa en man, ’n yster. Johan was ons teddiebeer. Hy het die kleinste hartjie gehad. Hy was ’n familieman, wat gelewe het vir my en die kinders.”
Me. Odendaal was vol lof vir die dokters, susters en verpleegsters “wat met die pandemie oorwerk is, maar steeds meer as 10 000 myl vir die pasiënte loop. As ek iemand kan uitsonder wil ek graag vir sr. Monica Jenkins baie dankie sê.”
Sy sê weens al die masjiene in intensief en in die hospitaal, is daar ’n probleem met sein op selfone.
“Wat vir my die swaarste was, was dat die kommunikasie ontoereikend was, veral in intensief, omdat sein beïnvloed word met die masjiene. Ek kan dalk voorstel dat die hospitaal daaraan werk en ook, soos by ander hospitale, dalk begin met ’n inbellyn. Hierdie lyne word beman deur byvoorbeeld maatskaplike werkers, wat die familie ingelig kan hou oor die pasiënte se presiese toestand. Die lyn werk volgens die pasiënt se identiteitsnommer.”
Sy glo dit sal die druk op die dokters en personeel ook minder maak, sodat hulle hul volle aandag aan die pasiënte kan gee.
Mnr. Odendaal word oorleef deur sy vrou, Retha, kinders Yanke en Almerné, skoonseuns Henk en Jac, kleinseun Zian, sy ma, Rita Ligthelm, suster Martie Kolesky en broer Francois Odendaal.
Daar sal later begrafnisreëlings getref word.
