‘Operasie’ van etlike ure om bye te skuif
Twee byeboere het Maandagaand baie versigtig ’n groot swerm bye, wat nes gemaak het in ’n reuse boom in Kogelstraat naby Laerskool Staatspresident C.R. Swart, verwyder.
Martin Nel en Francois Erasmus het al om 18:30 plek gemaak onder die boom, waar hulle ’n seil en ’n byekas neergesit het om die bye veilig te skuif.
’n Joernalis van www.mobserver.co.za, asook lede van die Noodgroep Radiogroep Sektor 3 en reaksielede van CSC Tactical het kort daarna by hulle aangesluit.
Mnr. Nel het die hele tyd verduidelik wat hulle doen, sodat die lede en hul kinders presies kon volg hoe die byeboere werk.
Heel eerste het hulle die rookkannetjies met dennenaalde volgeprop en aangesteek om ’n rokie te vorm.
Daarna het die twee hul beskermende drag aangetrek en is mnr. Nel met ’n lang leer teen die boom op. Mnr. Erasmus het op die grond op die seil gewag.
Gewapen met ’n mes, emmer en tou het die lang proses om die bye te skuif begin.
Hope bye en heuningkoeke is in emmers afgestuur, die heuning is aan ’n sakeman, wat hulle van die bye in die boom vertel het, geskenk.
Die sakeman was self daar en het kort-kort nader gehardloop en ’n paar kwaai bye trotseer, om van die heuning by die byeboere te vat.
Mnr. Nel het ’n rukkie later uit die boom uit geskree dat hy die volgende koeke, wat hy “bloedkoeke” genoem het, afstuur. Hy het verduidelik dat dié koeke met eiers gevul is en nie geëet kan word nie.
Hy was nog besig om die reuse sigbare swerm los te maak, toe hy opmerk dat daar tussen die takke aan die agterkant nog ’n groot deel van die swerm sit en moes hulle ook dié uithaal.
“Ek het die media genooi, sodat mense kon sien wat ons as byeboere op byna ’n daaglikse basis doen. Ons klim partykeer op die snaaksste plekke in om bye uit te haal om te verseker dat mens en dier veilig is.”
Alhoewel hulle die bye na ’n plaas geskuif en in ’n byekas gesit het, het hy laggend genoem dat bye, “soos ’n vroumens, maar wispelturig is en soms dadelik uit die byekas trek na ’n ander plek toe.
Mnr. Nel het gewaarsku dat bye nou uiters aggressief is, omdat hulle trek voor die winter en hul neste wil beskerm.
Mense moet onder geen omstandighede self bye probeer uithaal, gif of selfs rook by die bye spuit nie, want dit kan hulle laat aanval.
Persone wat bye wil laat uithaal, kan mnr. Nel bel by 083 655 0179.
