So sê dr. Redge van Rensburg.

Hy sê die “terug werk toe” toetse wat groot besighede aanvra, is ’n onding.

“Niemand kan iemand vir 42 dae by die huis laat bly nie! Maar as hy positief was en hy toets weer na twee weke, gáán hy nog positief toets, al kan hy nie meer ander aansteek nie.”

Hy moet voortdurend briewe skryf vir maatskappye om hulle in te lig dat hy nié pasiënte weer gaan laat toets as hulle reeds positief getoets het nie.

“Dit plaas ekstra druk op die stelsel, wat pasiënte moet toets wat werklik siek is en moet wag vir die uitslae. Jy moet die lang rye sien hier buite en die helfte van hulle is mense wat gaan vir daardie ‘terug werk toe’ toetse!”

Die goue reël is, as die pasiënt wat die virus gehad het na 14 dae gesond genoeg is om te werk, kan hy beslis weer teruggaan werk toe, want hy sal niemand kan aansteek nie.

Daar is egter gevalle waar pasiënte, wat onderliggende siektes het, baie siek word en langer behandeling nodig het, wat dan nie kan terugkeer werk toe nie. Maar selfs in hierdie gevalle is dit onnodig om die pasiënt weer te toets vir die virus voor hy terugkeer werk toe.

• Die afgelope tyd is daar ook riemtelegramme dat mense die virus weer en weer kan kry. En selfs baie siek kan word.

Dr. Van Rensburg sê hulle het uit ondervinding met pasiënte die afgelope paar maande gevind dat pasiënte wat die virus gehad en herstel het, beslis teenliggaampies teen die virus opbou.

“Soos enige ander virus, kán jy die virus weer kry as jy daarvan herstel het, maar jy sal nie weer só siek word nie. As jy egter positief was en jy toets binne die 42 dae weer, is dit nie omdat jy die virus wéér gekry het nie. Jou toets is net nog positief.”