Fotoman skielik vanoggend oorlede
Die welbekende oom Piet de Lange (77) is vanoggend (Maandag) in die vroeë oggendure in die Life Midmed Hospitaal oorlede.
Sy vrou, Lieze, sê hy het weens longontsteking gesterf.
Mnr. De Lange was sowat ’n maand gelede ook in dié hospitaal waartydens vog van sy buik getrek is.
“Hy het Vrydagnag gesê hy kry koud en Saterdag die hele dag gelê. Sondag het ek ’n ambulans ontbied en vanoggend kort na 04:00 het hulle my gebel en gesê hy is oorlede. Dit was so vinnig,” het sy hartseer gesê.
Die meeste inwoners ken die De Lange egpaar wat ’n paar jaar gelede ID-foto’s geneem het in hul karavaan voor Binnelandse Sake. Die afgelope ses jaar was hulle aan die stuur van sake by Elite Foto’s in SADCstraat.
Me. De Lange vertel dat haar man eers gewerk het as provinsiale verkeersman. Daarna was hy vir jare ’n ondersoeker van voertuie by die munisipaliteit en later hoof by die lisensie-afdeling.
Met sy aftrede het hy aangesluit by sy vrou om hand by te sit met die besigheid.
“Piet was my alles, my staatmaker. Hy het so mooi na my gekyk toe ek verlede jaar so siek was,” sê me. De Lange.
Sy kinders en kleinkinders onthou hom as die platjie wat gereeld pittige opmerkings gemaak het en altyd reg was met ’n grappie of die regte raad.
Selfs by die Middelburg Observer was hy welbekend, waar hy soms ingeloer het om te groet en seker te maak dat reg en geregtigheid geskied.
Mnr. De Lange word oorleef deur sy vrou, Lieze, kinders, Gerda Jansen van Nieuwenhuizen en Jannie de Lange, skoonkinders Carien, Leander en Adri, agt kleinkinders en drie agterkleinkinders.
• Persone wat met die gesin kontak wil maak, kan Gerda bel of WhatsApp by 071 467 6805.
