Daarvoor moes hy báie stadiger as gewoonlik hardloop.

‘Johan kry medalje vir sy versameling!’

Johan Oosthuizen het Saterdag die eerste man in die wêreld geword wat ál die Comrades medaljes verower het.

Dié onnie van Laerskool Middelburg moes Saterdag maar briek aandraai op die roete om die Vic Clapham medalje te kry.

Om in aanmerking te kom vir dié medalje moet jy die Comrades in ‘n tyd van tussen 11 en 12 ure voltooi en hy en sy hardloopmaat, Danie Bekker, het dit klaargemaak in ‘n tyd van 11;35.

Oosie sê Danie was vir hom soos die Bybel se “Aäron” op die roete. Hy het die banier help dra, wat aangedui het watter medaljes hy al in sy versameling het.

“Ek wou net aan die begin en dan aan die einde die banier by iemand kry, maar ons het op die ou einde die hele roete daarmee gehardloop!”

Hy en Danie, wat al jare saam oefen en die Comrades hardloop, het in Run & Walk for Life se kleure deelgeneem.

Oosie sê sy 19 medaljes in sy kas, kon hy nie verwerf het as dit vir die ondersteuning was van sy familie, almal wat deel is van Laerskool Staatspresident C.R. Swart, mede-atlete en elke Middelburger.

“Ek was ‘n student met my eerste Comrades, maar met al 18 die ander medaljes was ek ‘n Middelburger! Dis vir elkeen van julle, vir hardlopers soos Deon Holtzhausen, Albertyn Claassens, Hein Koch, wat my bekend gestel het aan marathon-hardloop en my geïnspireer het om beter te word.”