Die VF Plus het daarom ’n dringende skrywe aan die provinsiale departement van gesondheid gerig om veiligheidsmaatreëls vir gesondheidswerkers tydens die staking te verskerp.

Dié versoek volg nadat ’n video verlede week op sosiale media versprei is waarin gesien kan word hoe lede van Nehawu ’n jong vroulike dokter met geweld uit haar kantoor in ’n Mpumalanga-hospitaal verwyder.

“Nehawu het boonop luidens mediaberigte laat blyk dat die staking, wat met intimidasie en die dood van pasiënte gepaardgaan, verskerp sal word,” sê Weber.

“Alhoewel die staking ’n nasionale aangeleentheid is, is elke provinsiale departement steeds verantwoordelik vir die veiligheid van sy werkers,” las hy by.

Weber waarsku dat die VF Plus die departement aanspreeklik sal hou indien ’n soortgelyke voorval weer in Mpumalanga plaasvind en sal toesien dat die departement sy grondwetlike plig rakende gesondheidsorg in die provinsie nakom.