Maar nou is dit net herinneringe.

Harry (70) is gisteraand oorlede.

Hy is in Oktober verlede jaar met longkanker gediagnoseer. Die kanker het later na sy rugwerwel versprei en hy is gisteraand om 21:00 in die Life Midmed Hospitaal se intensiewe sorgeenheid oorlede.

Harry het sy buiging vir Suidoos-Transvaal teen Noord-Transvaal gemaak op heelagter in 1973. Suidoos het met 16-34 verloor. Daardie jaar het hy ook teen Italië op heelagter begin, ’n wedstryd wat Suidoos met 39-12 gewen het.

Die blondekop was meer bekend as heelagter maar met Belfast se China Vorster, wat vanaf Wes-Transvaal by Belfast aangesluit het, het hy aanvanklik meestal op losskakel begin.

Behalwe die wedstryd teen Suidwes-Afrika in Windhoek toe Frans Badenhorst die nommer tien trui gedra het, het hy in 1975 ook in al die Suidoos-Transvaal wedstryde gespeel.

Die volgende jaar het die losskakel trui gewissel tussen Badenhorst, Hendrik Koekemoer en Harry.

Hy het sy veelsydigheid in 1977 gewys deur op senter uit te draf saam met sy klubmaat, Chris Botha, met die Witbanker, Frikkie Lourens, op heelagter.
Vanaf 1978 was daar net een heelagter in grys: Harry Muller!

4 Junie 1983 is die hoogtepunt van sy loopbaan toe hy in sy honderdste wedstryd vir Suidoos-Transvaal teen die Westelike Provinsie op die Johan van Riebeeck Stadion in ’n Lionbeker wedstryd uitdraf.

Harry skop naby die einde ’n belangrike strafdoel oor en Suidoos verras die byna Springbok span met 24-19. Hy word skouerhoog van die veld gedra.Hy het uiteindelik 126 wedstryde vir Suidoos-Transvaal gespeel en 873 punte aangeteken.

Alhoewel hy destyds deur Transvaal genader is om sy rugby in Johannesburg te gaan speel, was hy ’n Middelburger in murg en been. Hy is hier gebore en het aan Hoërskool Middelburg matrikuleer. Hy het vir sy vrou, Mari, gesê hy wil op geen ander dorp bly nie.

Die oud klub voorsitter, Gerrie Gerrits, het gesê “Harry was ’n yster!”

Harry het sekerlik meer as honderd wedstryde vir Middelburg gespeel.

Hy laat sy vrou Mari, sy seun Jaco en skoondogter Richanny, kleinkinders Eduan en Darius, dogter Anneri en skoonseun Gunther, agter.

Begrafnisreëlings is nog nie bekend gemaak nie.