Danksy die flinke reaksie van Noodgroep Radiogroep Sektor 3 lede, is twee verdagtes vasgetrek terwyl hulle op pad was om gesteelde kabels by ’n skrootmetaalhandelaar te smous.
Die twee diewe kon gearresteer word nadat lede op die Sektor WhatsApp-groep foto’s van hulle geneem en versprei het.
Volgens een van die lede, me. Ansie Meintjes, het die diewe Telkom internetkabels skuins oorkant haar huis in SADCstraat gesteel.
Hoewel die verdagtes eers Dinsdag betrap is met die kabels, het hulle oor die naweek reeds begin om die kabels op te grawe.
me. Meintjes sê dat dit die tweede diefstal in ’n kwessie van twee weke was, en dat Telkom se personeel die laaste keer vir vyf dae, dag en nag gespook het om die gesteelde kabels te vervang.
Hulle verbinding met die internet is onderbreek, maar hulle het nooit vermoed dat dit as gevolg van ’n diefstal was nie.
Me. Meintjes het Maandag twee mans in grys oorpakke gesien ’n sloot grawe, en het aanvanklik gedink hulle werk vir Telkom.
Dit was eers daarna wat hulle agter gekom het die kabels is gesteel.
Nadat die diefstal op die groep aangemeld is, kon lede daarin slaag om die diewe, wat weer Dinsdag teruggekeer het om hulle werk te voltooi, af te neem.
Hulle is daarna deur lede van die munisipale polisie in Wichtstraat gevang waar hulle op pad was om die kabels te verkwansel.
