Me. Melissa du Preez het vanoggend die lede op die WhatsApp-groep van die gemeenskapspolisiëringsforum Sektor 4 ingelig dat daar by hul Wendyhuis in Kanonkop (hoek van Karee- en Oribistraat) ingebreek is.

“Dit is die tweede keer dat iemand by een van die Wendy’s op ons erf inbreek.”

Sy is kort na 05:00, net toe beurtkrag begin het, gewek deur ’n klapgeluid. Sy het na buite geloer, maar die Wendyhuis is nie binne sig van hul kamervenster nie.
Kort daarna is hulle na buite, waar hulle opgemerk het dat dit die Wendyhuis se deur is wat in die wind oop- en toeslaan.

Me. Du Preez sê dat die dief die sluitmeganisme, waaraan die slot haak, uitgehaal en dit met slot en al op die grond gegooi het.
Alles in die Wendyhuis wat in bokse of in sakke was, is oopgeskeur om te kyk wat binne-in is.

“Ons weet nie op hierdie stadium of daar enigiets gesteel is nie, aangesien alles deurmekaar gegooi is binne. Tydens die vorige inbraak by die ander Wendyhuis het dieselfde gebeur. Alles is ook so deurmekaar gegooi.”

Sy het vies gesê dat daar ook al twee keer ’n tuinslang by hulle gesteel is.

“Ons het ’n hoë palissadeheining. Ek weet nie hoe die dief in die erf gekom het nie.”