Twee groot honde het ’n betreder gisteraand laat spaander by ’n huis in Kanonkop.

Lede van die Sektor 4 Nood Radiogroep (Kanonkop/Dennesig/Middedorp) en die Sektor 4 Gemeenskapspolisiëringsforum was gisteraand bedrywig toe daar bykans gelyke tyd op WhatsApp-groepe gesê is dat hulle probleme het met betreders.

CCTV Videomateriaal wys dat ’n boef rondgesluip het in Impalastraat en ook onder ’n afdak langs ’n voertuig op die grond rondgekruip.

Hy het ook direk in die kamera ingekyk.

Voordat hy egter enigiets kon steel, het twee groot honde hom agterna gesit en het hy met die spoed van witlig in die erf afgehol en oor die muur verdwyn.

Die lede is ook uit na ’n huis in Oribistraat waar ’n betreder op die erf was.

Met hul aankoms, was hy reeds weg en het die lede in die omgewing rondgery om hom te soek.

’n Klein rukkie later het hulle ’n hopie van sy klere naby die taxistaanplek in die veld in Kanonkop (Sipresweg) gekry.