Dit is die derbyweek en HTS Middelburg, wat die gasheerskool is, skud sy vere reg vir een van die grootste sportweke ooit.

Die aksie het reeds vanoggend (Maandag) begin met gholf en muurbal.

Dinsdagaand het die Rooies hulle spanne bekend gestel en die gholftrekking van die Old Boys gholfspanne het by die Middelburg Buiteklub plaasgevind.

Woensdag takel die A hokkiespanne mekaar by HTS Middelburg se astrobaan.

Vrydag hou die twee skole weer hulle optogte deur die dorp met HTS wat rooi en groot gaan.

Hulle optog begin om 8:15 vanaf die skool en strek daarna tot by Laerskool C.R. Swart, die Middelburg Observer in Meyerstraat, Laerskool Kanonkop, Laerskool Dennesig, Laerskool Middelburg, Middelburg Primary en Aerorand Primary en stop weer om 12:00 by HTS waar daar gees gevang word.

Die tennis en skiet vind die middag plaas.

Die rugby skop om 7:30 Saterdag af met die o/14A spanne se kragmeting en die hoofwedstryd is om 15:00.

’n Interessante toevoeging is die Pumas se laerskole spanne wat in aksie is vanaf 8:35 voordat die o/15A spanne van die twee skole om 10:45 speel.
Die netbal begin om 8:15 met die o/19A spanne wat om 11:30 in aksie is.

Na die dag se sport word daar ’n musiekkonsert by die skool aangebied.

•Moenie die derby bylaag in Donderdag se Middelburg Observer misloop nie. Daar is vele kleurryke foto’s van die twee skole se spanne. Koop ’n koerant en bewaar hierdie mooi herinneringe.