Raadslid Deon van der Merwe sê die transformator het ontplof enkele minute nadat die kragtoevoer na 09:00 weer herstel is.
Hy sê die hele Mineralia is op die stadium uitgedoof en dat huise in Suid ook geaffekteer is.

Die skade is aangemeld maar dis tans onduidelik hoe lank herstelwerk gaan neem.
Die munisipaliteit is egter reeds besig met herstelwerk.

Die munisipaliteit kry tussen 500 en 900 oproepe weens kragonderbrekings na elke beurtkrag-fase.

Munisipale bestuurder Mandla Mnguni het die week weer gewaarsku dat munisipale hulpbronne tot die uiterste beproef word met beurtkrag.
Vandalisme en diefstal speel ook ’n groot rol.

Daar is juis gisteraand weer ’n kragkabel in Newtonstraat gesteel.

Dit is die derde keer in net ’n jaar, dat die spesifieke kabel in Newtonstraat gesteel is.

Mnr. Mnguni sê dat Middelburg se kragnetwerk nie ontwerp is om deurlopend aan-en-af geskakel te word nie.

Kragstuwings veroorsaak onuithoudbare druk op die netwerk, en lei tot probleme soos die ontploffing van transformators.

Hy vra dat inwoners onnodige elektriese toestelle soos geysers en swembadpompe stelselmatig na beurtkrag aanskakel.