Izak en Ansie du Plessis was een van die gelukkiges om nie net die belewenis in lewende lywe te ervaar nie, maar dit op kamera vas te vang.

Ansie vertel dat sy en Izak saam met haar broer vir die week by Satara gaan kampeer het, toe Izak in die vroeë oggendure opgestaan het om van die badkamergeriewe gebruik te maak.

“Dit was doodstil en al wat ek kon hoor was die geluide van die hiënas wat ’n karkas opskeur.”

Izak het met sy flits gelig waar hy die drie hiënas skaars 20 meter van hulle staanplek af gesien het aan iets vreet.
Hy was eerste op die toneel maar het vinnig sy swaer en Ansie gaan wakker maak om die besondere oomblik saam met hom te beleef.

Ansie het vertel dat baie dinge deur hulle gedagtes geflits het en dat hulle eers onseker was of die hiënas besig was om te vreet aan mens of dier. Met nadere ondersoek (let wel op ’n veilige afstand) het hulle toe gesien dat die karkas die van ’n rooibok is.

Terwyl ander kampeerders om hulle wakker geword het, het een van die hiënas spoorloos verdwyn en net twee het oorgebly.

Hulle het duidelik net in hulle maaltyd belang gestel en die groep kampeerders het saam met Ansie en Izak tot 05:00 gestaan en kyk, tot net die kop en bene van die karkas oorgebly het.

Ansie en Izak vertel dat dit ’n buitengewone ondervinding was wat hulle nooit sal vergeet nie, maar dat dit opnuut respek vir die natuur, in hulle wakker gemaak het.

“Ons het net weer besef om nooit sonder ’n flits in enige wildspark rond te loop nie en ook nie kinders alleen te laat rondloop nie.”

• Een van die ander kampeerders het in ’n onderhoud met ’n ander koerant vertel dat ’n luiperd die rooibok gevang het, toe die hiënas dit van hom weggeneem het.

“Ek was eerste om hulle raak te loop. Daar was ’n jakkals ’n ent daarvan af, maar ek het nooit die luiperd gesien nie.”