Inwoners van Kanonkop en Dennesig hoop hulle sal nou kan rustig slaap nadat ’n vermeende dief van solarligte vanoggend in Oribistraat vasgetrek is.
Juanita Groenewald (ondervoorsitter, NRS3) sê die Noodroep Radiogroep Sektor 3 het vroeg vanoggend reageer op inligting dat ’n man ’n solarlig in Wag ’n Bietjiestraat gesteel het en “aan die hardloop is”.
Hulle het die lede van die Noodroep Radiogroep Sektor 4 (Kanonkop/Dennesig) in kennis gestel en die lede van die Dagpatrollie het ook gehelp met die soektog na die verdagte.
In Oribistraat is hy vasgetrek en is die solarlig teruggekry.
• Dit is al die derde keer dat die betrokke verdagte deur radiogroeplede gevang word vir spesifiek diefstal van solarligte.
“Ons het hom in Gholfsig ook gevang, maar die polisie moes hom ongelukkig elke keer laat gaan, omdat mense nie sake wil maak nie! As hulle hul ligte terugkry, dan wil hulle nie aangaan met die sake nie. Mense moet onthou dat hulle sake moet maak, alvorens ’n verdagte aangekla kan word,” sê Juanita.
• Sy het bevestig dat die slagoffer van vanoggend se diefstal wel ’n saak geopen het en die man gearresteer is. Hy sal na alle waarskynlikheid vanmiddag of more in die hof verskyn.
