Hein Janse van Rensburg se vier seuns is baie bly hul pa is uit die hospitaal ontslaan na die traumatiese gebeure waar hy deur hul pit bulterriër aangeval is.

Hein jnr (14), Jaco (11), Hendrikus (3) en Heinrich (17 maande) draai al om hul pa om seker te maak hy is gemaklik.

Dit gaan beter met Hein wie se hande twee weke gelede deur sy pit bulterriër verskeur is.

Hy het met sy hande gekeer toe sy hond, Rocky, hom omgespring en in die gesig en nek wou byt.

Hy is verlede week in die Life Midmed Hospitaal opgeneem waar hy twee keer teater toe is vir operasies aan beide sy hande.

Hein is intussen ontslaan en sterk tuis aan.

“Ek voel elke dag ’n bietjie beter. Ek sien Maandag weer die dokter, dan sal hulle kyk wat die skade aan my hande is.”

Die hond het sy hande geweldig verskeur en hy het tans in van sy vingers aan sy linkerhand geen gevoel nie.

“Die dokter het gesê my hande gaan ’n lang tyd neem om te herstel.”

Hein is bekommerd aangesien hy die eienaar is van ’n insleepdienste.

“My insleepvoertuig het gestaan en ek was besig om aan hom te werk in die tyd voor ek gebyt is.” Hy mag glad nie sy hande gebruik tans nie en kan nie bekostig dat iemand anders die bakkie regmaak en hy iemand kry om te help met die insleepvoertuig nie.

• Intussen is daar nog etlike duisende rande uitstaande op die mediese rekeninge, aangesien die gesin nie ’n mediese fonds het nie.
Hulle bedank elke persoon wat tot nou toe bydraes gelewer het.
Mense wat wil help met die mediese uitgawes, kan 079 183 1059 bel (hospitaal se rekeningbesonderhede sal verskaf word).