Dié saak sal in die Hooggeregshof in Polokwane voorkom, vanaf 31 Julie.

Daar word beweer dat Phillip Machidi, Calvin Tseka en Paulina Mamalope saamgesweer het om Papapavlou te vermoor.

Phillip Manchidi is op 8 April gearresteer vir sameswering om moord te pleeg.
Manchidi was uit op parool na hy in die gevangenis was vir ’n ander moord en transitorooftogte.

Papapavlou is op 4 Oktober 2020 op die plaas Rooikraal, tussen Groblersdal en Stoffberg, in sy bed doodgeskiet.

Die ma en seun, Tseka (31) en Mafatle (57), wat ook daarvan beskuldig word dat hulle saamgesweer het om Papapavlou te vermoor, het vroeg in Januarie 2023 borg van R2 500 elk gekry. Mafatle was Manchidi se vriendin.

Tseka se borgvoorwaardes het bepaal dat hy twee keer per week by die Silverton Polisiestasie aanmeld, omdat hy by sy werksplek gearresteer is en sy ma se woning te klein is vir hom om ook daar te bly.

Tseka en Mafatle is in Augustus verlede jaar in Gauteng in hegtenis geneem.

Die ondersoekbeampte, adjudant offisier Debbie van Zyl, het tydens hul borgaansoek getuig dat beide Tseka en Mafatle telefoonkommunikasie met Patricia Ray-Lee Smith en Simoné Papapavlou gehad het. Hulle het ook glo beide fondse van Smith ontvang, voor Raymond se moord.

Daar is tydens Simoné se borgaansoek getuig, dat ’n verhouding tussen haar en Ray-Lee Smith, die motief was vir Raymond se moord.
Smith is kort na Raymond se moord in hegtenis geneem en Simoné byna ’n jaar later.

Ná ’n lang hofstryd is Simoné op borg van R15 000 vrygelaat. Haar mede-beskuldigde, Smith, is uit op borg van R5 000.