Dogter vra: ‘Moenie Carmen se leuens glo’

So sê Meagan-Leigh White-Sharpley (19), haar dogter.

“Ek is moeg vir al die jare se leuens en hoe my biologiese ma my “naam misbruik om haar dade te regverdig.”

Carmen is in eMalahleni gearresteer vir die besit van ’n gesteelde voertuig.

Mnr. Kobus van Staden se Ford Fiesta is by Moddercourt Woonstelle gesteel. Hy het Carmen later op CCTV-videomateriaal herken waar sy met die voertuig wegry.

Carmen, wat vandag aansoek doen vir borg in die Witbank Landdroshof, sal waarskynlik dan daarna in die Middelburg Landdroshof verskyn op ’n klagte van kardiefstal.

Meagan hoop in haar hart dat “Carmen” (soos sy haar noem), gevangenisstraf sal kry.

“Dit sal haar dalk op die regte pad bring. Sy is ’n kompulsiewe leuenaar. Sy het vir mnr. Van Staden gesê sy wil ’n afstandbeheer hê om vir my te gee, maar sy het vir hom gejok. Sy het nie eers kontak met my nie!”

Meagan noem haar aanneemma, Fay Cook, haar “Mommy” en is dankbaar dat sy die kans in haar lewe gegun is om weg te kom van haar biologiese ma af en ’n sukses van haar lewe te maak.

Sy het in 2023 haar matriek geskryf en voel sy dat sy nou volwasse genoeg is om hul verhaal te vertel.

Meagan en “Mommy Fay” het om die beurt vertel van al die jare se verleentheid.

Meagan was aanvanklik in Carmen se sorg en was as 10-jarige dogtertjie by haar aanneemma en pa. Op 15-jarige ouderdom is sy finaal deur Fay aangeneem.

Alhoewel Carmen aanvanklik baie beloftes aan Meagan gemaak het toe sy klein was, “was dit altyd leuens en het sy geen beloftes nagekom nie.”

Selfs nadat die hof Carmen wou help deur haar te dwing om sewe opheffende lewenskursusse te volg om nog haar kind te sien, het sy net aan die begin belanggestel, maar haar nie verder daaraan gesteur nie.

Meagan moes die afgelope 10 jaar tientalle kere haar kop in skaamte laat sak as mense haar opgespoor het om te vertel wat haar ma gedoen het.

“Sy het verskeie kere by kerke aangesluit en sodra hulle haar vertrou het, het sy hul kollektegeld gesteel. Dan is sy maar net na ’n ander kerk toe.”
Haar biologiese ma het nie omgegee om haar dogter keer op keer in die verleentheid te stel nie.

“Daar het kinders na my toe gekom by die skool en vertel dat my ma by hul ouers geld gesteel het!”

Meagan onthou die keer toe ’n man by hulle opgedaag het, omdat Carmen gesê het sy het R500 nodig om haar dogter te help.
Hy het by hulle opgedaag en die geld geëis, “want sy het nie geld vir doeke nie. Sy het sy laaste geld gevat.”

Sy onthou ook hoe haar ma uitgevang is deur ’n kleuterskool dat sy onderwysdiplomas vervals het om daar te werk.
“Boonop het sy die kleuters se snoepiegeld uit hul tasse gesteel!”

Meagan sê Carmen het ook by mense geld gevat vir ’n selfoon of bromponie vir haar en as die mense navraag daaroor gedoen het, dan moes Meagan vir hulle sê Carmen het gejok.

“Sy het selfs ’n persoon se ouma se selfoon gesteel en toe sy uitgevang word, het sy gesê sy het die selfoon vir my gevat!”

Meagan het verskeie kere tydens die onderhoud aanmekaar gevra dat dit duidelik gestel moet word dat mense nie enige leuens wat Carmen opmaak oor haar dogter, moet glo nie.

“Mommy Fay, die vrou wat my grootgemaak het, is my ma. Carmen het haar lewe gekies.”

• Meagan het haar Facebookprofiel verander, omdat mense haar altyd op Facebook gaan soek het as haar ma hulle belieg of besteel en haar naam gebruik het.

• Meagan het genoem dat Carmen aan haar erken het dat sy kokaïne en kristal metamfetamien (Crystal Meth) gebruik.

• Daar is gemeld dat Carmen soms haar nooiensvan, Cant, gebruik.