Dodelike snoetneuskobra by besigheid gevang
’n Dodelike snoetneuskobra, wat glad nie in Middelburg voorkom nie, is vanoggend by ’n besigheid in Jeppestraat gevang.
Bernard van den Berg sê die eienaar van die besigheid het hom gebel en hy het dadelik soontoe gery.
Met sy aankoms was hy verbaas om te sien dit is die giftige snoetneuskobra.
Hy het hom gevang en later deur die oggend buite Middelburg veilig losgelaat.
• Bernard is ’n komiteelid van die Middelburg Dierebeskermingsvereniging.
• Victor Boshoff (voorsitter van die Middelburg Herpetologiese Vereniging) sê dit is die eerste snoetneuskobra waarvan hy weet wat in Middelburg gevang word.
Hy vermoed die slang het saam met ’n voertuig, trok of karavaan vanaf ’n ander area in byvoorbeeld Limpopo gekom, waar hulle meer algemeen voorkom.
Die snoetneuskobra se gif is neurotoksies en sal ’n persoon sterf as hy nie antiserum kry nie.
“As jy nie seker is watter tipe slang dit is nie, moenie probeer om dit te vang nie. Dit is soos om met ’n gelaaide wapen rond te loop! As hy jou of iemand anders pik, terwyl jy hom probeer vang, kan jy sterf. Boonop is dit ’n baie vinnige slang, wat jou beslis sal aanval.”
Victor meld dat hul lede opgelei is om slange te vang en ook permitte het om die slange te vervoer en te gaan loslaat.
• Hulle het die afgelope tyd ’n hele paar giftige slange, soos swartmambas, wat nie natuurlik in hierdie area voorkom nie, gevang.
“Die slange begin plek soek vir die wintermaande om te slaap en dit is hoekom hulle al hoe meer in en om huise en motorhuise gevang word.”
@middelburgobserver Dodelike giftige snoetneuskobra, wat nie in Middelburg voorkom nie, by besigheid gevang. #snake #middelburg
